Wasiir Abdi Aynte aya bogiisa facebook ku soo ban dhigay heshiiska labadal somaaliya iyo kenya

by Hussein Mohamed | Monday, May 1, 2017 | 129 views

Bismillah:

Waxaan Nasiib u yeeshay inaan kamid noqdo wafdiga Madaxweynaha Soomaaliya Maxamed/llahi Farmaajo ee shalay soo gaaray Nairobi, maantana wada hadal qoto-dheer la yeeshay madaxda dalka Kenya. Dood dheer kaddib waxaan isku afgarannay qodobbadan:

1. In 2 toddobaad gudohood lagu soo afjaro hakadkii amni (security transit) ee Wajeer ay kusoo mari jireen duullimaadyada ka yimaadda Soomaaliya, halkaas oo ay silic iyo saxariir badan kala kulmi jireen shacabka. Hadda kaddib, duullimaadyada ka yimaadda Muqdisho waxay toos ugu dagi donaan Nairobi.

2. In muddo bil gudaheed ah laba bar ama marin soohdimeed laga sameeyo Beled-Xaawo/Mandheera iyo Dhoobleey/Libooy, halkaasna ay isaga gooshaan dadka iyo dunyada. Waxaana halkaas ku baxaya darbigii la sheegi jiray, waxaana si xowli ah isugu furmaya ganacsiga.

3. In laga billaabo maanta dadka haysta baasaboorrada diblomaasiga ah iyo kuwa adeegga (service) ay dal-ku-galkooda (visa) ka qaadan doonaan gegiyada dayuurdaha labada dal.

4. In arrimaha qaxootiga looga shaqeeyo hannaankii saddex geesoodka ahaa ee ay hore ugu heshiiyeen Kenya iyo Soomaaliya iyo Hey’adda Qaramada Midoobay u Qaabilsan Qaxootiga ee UNHCR.

5. In Kenya ay 200 oo macallin, 200 oo kalkaaliso caafimaad iyo 100 maamulayaal sare oo dowladeed ay si bilaash ah ugu tababareyso Soomaaliya.

6. In dib loo soo nooleeyo Guddiga Wadajirka ah ee Iskaashiga (JCC) halkaasna ay labada dowladood uga shaqeeyaan dhammaan howlaha ka dhaxeeya.

Dhammaan qodobbadan waa kuwa guul u ah Soomaaliya. #Himilo

Like it? Share it!

Leave A Response